हेटौंडा । बागमती प्रदेश सरकारकी कृषि, पशुपन्छी, वन तथा वातावरण मन्त्री रमा आले मगरले वन अतिक्रमणविरुद्ध कडा र निर्मम भएर काम गर्न डिभिजनल वन अधिकृतहरूलाई निर्देशन दिएकी छन् ।
बागमती प्रदेशको कृषि, पशुपन्छी, वन तथा वातावरण मन्त्रालयको सहआयोजना एवं वन निर्देशनालय बागमतीको आयोजनामा हेटौँडामा आयोजित दुई दिने वार्षिक समीक्षा गोष्ठीलाई सम्बोधन गर्दै मन्त्री आलेले सो निर्देशन दिएकी हुन् ।
कार्यक्रमको उद्घाटन गर्दै मन्त्री आलेले समीक्षा बैठकले औँल्याएका सुधारका मार्गचित्रलाई अक्षरशः कार्यान्वयन गर्नुपर्नेमा जोड दिए । उनले स्वदेशी काठको अधिकतम सदुपयोग गरी विदेशी काठ तथा फर्निचरको आयात घटाउनुपर्ने र भूसंरक्षणसम्बन्धी कामहरूको गुणस्तरमा विशेष ध्यान दिनुपर्ने बताइन् । वन निर्देशनालय बागमतीका वरिष्ठ उपनिर्देशक प्रल्हाद प्रसाद धितालको अध्यक्षतामा उद्घाटन समारोह सम्पन्न भएको थियो।
कार्तिक ११ र १२ गते सञ्चालित दुई दिने समीक्षा गोष्ठीमा गत आर्थिक वर्ष २०८२- ०८३ मा वन तथा वातावरण क्षेत्रमा सम्पन्न भएका वार्षिक कार्यक्रमहरूको समीक्षा गर्नुका साथै आगामी कार्यदिशाबारे छलफल गरिएको थियो।
कार्यक्रममा १५ वटा डिभिजन वन कार्यालय, ७ वटा भू तथा जलाधार व्यवस्थापन कार्यालय, चितवन राष्ट्रिय निकुञ्ज कार्यालय, वन अनुसन्धान तथा प्रशिक्षण केन्द्र (गोदावरी) र मरिन परियोजनाले गत आर्थिक वर्षको वार्षिक प्रगति विवरण प्रस्तुत गरेका थिए।
बागमती प्रदेश नीति तथा योजना आयोगका सदस्य डा। सुरेन्द्र वर सिंह थापा र प्रदेश सचिव डा. केदार बरालले समेत आवश्यक निर्देशन दिएको उक्त गोष्ठी विभिन्न सत्रमा विभाजन गरी सञ्चालन गरिएको थियो।
प्रदेश सचिव डा। केदार बराल, प्रदेश वन निर्देशक विद्यानाथ झा र मन्त्रालयका योजना महाशाखा प्रमुख अजय विक्रम मानन्धरले फरक(फरक सत्रको अध्यक्षता गरेका थिए ।
समीक्षा गोष्ठीमा रेड कार्यान्वयन केन्द्रका गतिविधि, ‘मरिन जलाधार बहुसरोकारवाला मञ्च स्थापना तथा सञ्चालन कार्यविधि (२०८३’ र ‘वन पेशाकर्मी कल्याणकारी कोष (२०७६)’ को प्रगतिबारे प्रस्तुतीकरण गर्दै सहभागीहरूबाट सुझाव सङ्कलन गरिएको थियो।
