काठमाडौं । त्रिभुवन विश्वविद्यालय, वन विज्ञान अध्ययन संस्थानको आयोजनामा सञ्चालित तीन दिवसीय अन्तर्राष्ट्रिय सम्मेलन आइतबार काठमाडौंमा सफलतापूर्वक सम्पन्न भएको छ।
‘भविष्यका लागि वन : संरक्षण, प्रविधि र दिगो विकास’ भन्ने मूल नाराका साथ आयोजना गरिएको उक्त सम्मेलनमा नेपालसहित ११ देशका वरिष्ठ नीति निर्माता, वातावरणविद्, प्राध्यापक तथा ३०० भन्दा बढी विद्यार्थी एवम् युवा शोधकर्ताहरूको उत्साहजनक सहभागिता रहेको थियो।
तीन दिनसम्म चलेको सम्मेलनमा जैविक विविधता संरक्षण, जलवायु परिवर्तनका चुनौती, हिमाली पारिस्थितिक प्रणाली र समुदायमा आधारित वन व्यवस्थापनका विषयमा घनिभूत छलफल भएको थियो। कार्यक्रममा सहभागी ३०० जना विद्यार्थी तथा युवा शोधकर्ताहरूले ११ देशका नीति निर्माताहरूसँग प्रत्यक्ष संवाद गर्दै आफ्ना अध्ययन, अनुसन्धान र नवीन सोच प्रस्तुत गर्ने महत्वपूर्ण अवसर प्राप्त गरे।
