हेटौंडा ।नेपालमा वन क्षेत्रको शिक्षा, अनुसन्धान तथा व्यावसायिक विकासलाई सुदृढ बनाउने उद्देश्यका साथ त्रिभुवन विश्वविद्यालय (त्रिवि) अन्तर्गतको वन विज्ञान संस्थान पोखरा क्याम्पस र कृषि तथा वन विज्ञान विश्वविद्यालय (AFU), हेटौंडा स्थित वन संकायबीच द्विपक्षीय समझदारी पत्र (MoU) मा हस्ताक्षर भएको छ।
हेटौंडास्थित कृषि तथा वन विज्ञान विश्वविद्यालयको वन संकाय, डीन कार्यालयमा मंगलबार आयोजित एक विशेष कार्यक्रमका बिच उक्त समझदारी पत्रमा औपचारिक हस्ताक्षर भएको हो।
सम्झौता पत्रमा वन विज्ञान संस्थान पोखरा क्याम्पसका क्याम्पस प्रमुख र कृषि तथा वन विज्ञान विश्वविद्यालय वन संकायका डीनले हस्ताक्षर गरेका हुन्। चार वर्षका लागि लागू हुने यो सम्झौताले दुवै संस्थाका प्राध्यापक, शोधकर्ता तथा विद्यार्थीहरूका लागि नयाँ अवसरहरू सिर्जना गर्ने अपेक्षा गरिएको छ।
सम्झौता अवधि सकिएपछि दुवै पक्षको आपसी सहमतिमा यसलाई पुनः नवीकरण गर्न सकिने व्यवस्था रहेको छ।
सहकार्यका मुख्य क्षेत्रहरू यस्ता छन् :
शैक्षिक आदानप्रदान: दुवै संस्थाका शिक्षक तथा विद्यार्थीहरूबीच ज्ञान र अनुभव आदानप्रदान गरिने।
संयुक्त अनुसन्धान: वन तथा वातावरण क्षेत्रका समसामयिक विषयहरूमा संयुक्त रूपमा अध्ययन-अनुसन्धान सञ्चालन गरिने।
व्यावसायिक तालिम: विद्यार्थी तथा प्राविधिक दक्षता अभिवृद्धिका लागि संयुक्त तालिम तथा कार्यशाला सञ्चालन गरिने।
प्रकाशन तथा ज्ञान साझेदारी: अनुसन्धानात्मक लेख तथा प्रकाशनहरूमा सहकार्य गर्दै संस्थागत सिकाइलाई प्रवर्द्धन गरिने।
नेपालका दुई प्रमुख विश्वविद्यालयका वन अध्ययन संस्थानहरूबीच भएको यस ऐतिहासिक सहकार्यले मुलुकको वन, वातावरण तथा प्राकृतिक स्रोत व्यवस्थापनको क्षेत्रमा महत्त्वपूर्ण योगदान पुर्याउने विश्वास लिइएको छ।
