बाँके । बाँके जिल्लामा कार्यान्वयनमा रहेको दिगो वन व्यवस्थापन कार्यक्रमले वन पैदावार उत्पादनमा उल्लेख्य वृद्धि ल्याउने अपेक्षा गरिएको छ।
डिभिजन वन कार्यालय बाँकेका अनुसार वन सम्वर्धन प्रणालीमार्फत सञ्चालन भइरहेको कार्यक्रमबाट वार्षिक करिब १० लाख क्युफिट काठ र १ हजार ८ सय चट्टा दाउरा उत्पादन हुने प्रक्षेपण गरिएको छ।
कार्यालय प्रमुख शंकरप्रसाद गुप्ताले वन व्यवस्थापनलाई वैज्ञानिक र योजनाबद्ध ढंगले अघि बढाइएकाले जिल्लाभित्र काठ तथा दाउराको आपूर्ति सहज हुने बताए । उनका अनुसार यस अभियानले स्थानीय स्रोतको उपयोग बढाउनुका साथै करिब १० हजार नागरिकलाई वर्षभरि प्रत्यक्ष रोजगारी उपलब्ध गराउने सम्भावना रहेको छ।
योजनाअनुसार चालु आर्थिक वर्ष २०८२ \८३ मा राप्तीसोनारी गाउँपालिकामा दुई नयाँ चक्ला वन विकास गरिएको छ। योजना शाखा प्रमुख तथा सहायक वन अधिकृत सुशील सुवेदीका अनुसार वडा नं. ३ र ४ मा भुवर भवानी तथा वडा नं. १ मा खर्चेताल चक्ला वन निर्माण भएसँगै जिल्लामा चक्ला वनको संख्या तीन पुगेको छ। यसअघि उक्त क्षेत्रमा माथेवास–शम्शेरगञ्जमा मात्र चक्ला वन रहेको थियो।
बाँकेमा हाल सरकारी संरक्षित क्षेत्रबाहेक २४७ वटा वन क्षेत्र रहेका छन्। तीमध्ये ११९ सामुदायिक वन, चार धार्मिक वन र १२४ निजी वन छन्।
जिल्लाको कुल १ लाख १९ हजार ९३९ हेक्टर वन क्षेत्रमध्ये ५२ प्रतिशत भाग बाँके राष्ट्रिय निकुञ्जभित्र पर्दछ भने बाँकी ४८ प्रतिशत क्षेत्र डिभिजन वन कार्यालयको व्यवस्थापन तथा संरक्षणको दायरामा रहेको छ।
