रौतहट । रौतहटमा काठ तस्करी गर्ने समूहले प्रहरी र वन कर्मचारीलाई झुक्याउन तस्करीको शैली परिवर्तन गर्न थालेका छन्। पछिल्लो समय जंगलमै सालको काठ चिरान गरी सानो आकारको ‘कडी’ बनाएर बाहिर निकाल्ने गरेको पाइएको छ।
यसै क्रममा धनसार–गौँडाटार सीमा क्षेत्रको घना जंगलबाट डिभिजन वन कार्यालय रौतहटको रात्रि गस्ती टोलीले मंगलबार राति करिब साढे ९ बजे बेवारिसे अवस्थामा राखिएको सालको चिरान काठ बरामद गरेको छ।
डिभिजन वन कार्यालयका अधिकृत अनिलकुमार महतोका अनुसार काठ कसले र कुन प्रयोजनका लागि चिरान गरी राखेको हो भन्ने खुलेको छैन। काठ नियन्त्रणमा लिएर अनुसन्धान भइरहेको छ।
वन कार्यालयका प्रमुख मनोज ठाकुरका अनुसार अवैध कटानी, चोरी तथा निकासी नियन्त्रणका लागि रात्रि गस्ती र निगरानी थप प्रभावकारी बनाइएको छ। वनकर्मीको निगरानी बढेसँगै तस्करले समेत तस्करीको तरिका परिवर्तन गर्न थालेको बताइएको छ।
