धनुषा । डिभिजन वन कार्यालय धनुषाले पूर्व–पश्चिम राजमार्ग नजिकै रहेको एक काठ उद्योगमा छापा मारी ठूलो परिमाणमा अवैध काठ बरामद गरेको छ। कार्यालयको टोलीले सोमबार साँझ मिथिला नगरपालिका–२, विश्वकर्मा चोकस्थित ‘कमला भेनियर उद्योग’मा छापा मारेर ६७५ क्युफिट सिमल जातको काठ नियन्त्रणमा लिएको हो।
विशेष सूचनाका आधारमा पुगेको वन कार्यालयको गस्ती टोलीले उद्योग परिसरमा भण्डार गरी राखिएको ७८ थान (गोलिया) सिमलको काठ बरामद गरेको छ। डिभिजनल वन अधिकृत (डिएफओ) विनोद सिंहका अनुसार बरामद गरिएको काठको वैध स्रोत, खरिद–बिक्री तथा ओसारपसार सम्बन्धी कुनै पनि आवश्यक कागजात उद्योग सञ्चालकले तत्काल पेस गर्न सकेका थिएनन्।
”उद्योगमा अवैध रूपमा काठ भण्डारण गरी राखिएको सूचनाका आधारमा हामीले छापा हानेका हौं,” डिभिजनल वन अधिकृत सिंहले भने, “सोधपुछ र जाँचबुझका क्रममा काठको स्रोत र ओसारपसार सम्बन्धी प्रमाण देखाउन नसकेपछि ६७५ क्युफिट काठ नियन्त्रणमा लिइएको छ।” काठ बरामद गरिएपछि डिभिजन वन कार्यालय धनुषाले उद्योग सञ्चालकमाथि वन ऐन अनुसार थप अनुसन्धान अघि बढाएको छ। उक्त काठ कुन क्षेत्रबाट चोरी-निकासी गरी ल्याइएको हो भन्ने विषयमा सूक्ष्म छानबिन भइरहेको वन कार्यालयले जनाएको छ।
