कपिलवस्तु । शिवराज नगरपालिका–१, भलुहीस्थित जनचेतना सामुदायिक वन उपभोक्ता समूहले काठ तथा दाउरा बोलपत्रमार्फत लिलाम बिक्री गर्ने भएको छ ।
समूहले स्वीकृत वन व्यवस्थापन कार्ययोजना तथा डिभिजन वन कार्यालय, कपिलवस्तु गौतमबुद्धको संकलन सहमतिअनुसार आर्थिक वर्ष २०८१-८२ र २०८२- ०८३ मा संकलन गरी उत्पादन भएका काठ तथा दाउरा लिलाम गर्न लागेको हो ।
समूहका अनुसार आर्थिक वर्ष २०८१-०८२ मा संकलन गरी उत्पादन भएका तथा आपूर्ति समितिबाट फिर्ता प्राप्त र उपभोक्तालाई बिक्री गरेपछि बाँकी रहेको साल जातको १५६ थान गोलिया काठ गरी १ हजार १७०.९४ क्युफिट काठ लिलाम गरिनेछ ।
त्यस्तै, आर्थिक वर्ष २०८२-०८३ मा संकलन गरी उत्पादन भएका साल, असना, कर्मालगायत जातका ९९२ थान गोलिया काठ गरी ५ हजार ८२९.१६ क्युफिट काठ रहेको समूहले जनाएको छ ।
दुवै आर्थिक वर्षको गरी कुल १ हजार १४८ थान गोलिया काठ लिलामका लागि राखिएको सूचनामा उल्लेख छ । साथै साल तथा अन्य जातको गरी २१ चट्टा दाउरा पनि लिलाम बिक्री गरिनेछ । पाटगद्दीमा विभिन्न लट बनाएर राखिएको काठ तथा दाउरा जे–जस्तो अवस्थामा छ, सोही अवस्थामा आफ्नै खर्चमा उठाई लैजानुपर्ने सर्तमा बिक्री गरिने समूहले जनाएको छ ।
समूहले वन पैदावारमा आधारित काठ तथा दाउरा उद्योगलाई बोलपत्र प्रक्रियामा सहभागी हुन आह्वान गरेको छ । सूचना पहिलोपटक प्रकाशित भएको मितिले २१ दिनभित्र बोलपत्र खरिद गरी प्रत्येक लटका लागि छुट्टाछुट्टै सिलबन्दी बोलपत्र पेश गर्नुपर्नेछ ।
बोलपत्र २२औँ दिनको दिउँसो २ बजेसम्म दाखिला गर्नुपर्ने सूचनामा उल्लेख छ । बोलपत्रसम्बन्धी विस्तृत जानकारीका लागि जनचेतना सामुदायिक वन उपभोक्ता समूहको कार्यालयमा सम्पर्क गर्न सकिने जनाइएको छ ।
