हेटौंडा ।वन विज्ञान अध्ययन संस्थान, हेटौंडा क्याम्पसले पहिलो ‘ग्र्याजुएट कन्फरेन्स’ (Graduate Conference) को आयोजना गरी बिएस्सी फरेष्ट्री २०७९–०८३ ब्याचका ७३ जना विद्यार्थीहरूलाई ग्राजुएट गराएको छ। क्याम्पसमा आयोजित विशेष समारोहका बीच विद्यार्थीहरूलाई बिदाइ तथा बधाई ज्ञापन गर्दै ग्राजुएसन गराइएको हो।
सोही कार्यक्रमको अवसर पारेर पूर्व विद्यार्थीहरूलाई सङ्गठित बनाउने उद्देश्यले ‘पूर्व विद्यार्थी समाज’ (Alumni Association) को ९ सदस्यीय तदर्थ समितिसमेत गठन गरिएको छ। अजय विक्रम मानन्धरको अध्यक्षतामा गठित उक्त तदर्थ समितिको सदस्य सचिवमा रामदेव चौधरी चयन हुनुभएको छ।
त्यस्तै समितिका सदस्यहरूमा सुजित कुमार झा, सुर्य प्रसाद मैनाली, बसन्त राज गौतम, गोविन्द अर्याल, प्रेमा थापा, सुगम भुसाल र रोजिता बन्जारा रहनुभएको छ। नवगठित समितिले क्याम्पसको शैक्षिक विकास र पूर्व विद्यार्थीहरूबीचको आपसी सम्बन्धलाई थप मजबुत बनाउन प्रभावकारी भूमिका खेल्ने विश्वास लिइएको छ।
